پارلیمانی روابط، تجارت، ثقافت، سیاحت اور عوامی سطح پر تعلقات مزید مضبوط بنانے کے عزم کا اظہار، سفیر کی اہلیہ نے پاکستان پر لکھی کتاب کا تحفہ پیش کیا
اسلام آباد (اظہار خان نیازی) سینیٹ چیئرمین پاکستان کی مشیر اور بین الپارلیمانی اسپیکرز کانفرنس کی سفیر مصباح کھر نے اسلام آباد میں آذربائیجان کے سفارت خانے میں جمہوریہ آذربائیجان کے سفیر خضر فرہادوف سے ملاقات کی۔ ملاقات میں پاکستان اور آذربائیجان کے درمیان دیرینہ برادرانہ تعلقات، پارلیمانی روابط، تجارت، ثقافت، سیاحت اور عوامی سطح پر روابط کے فروغ سمیت باہمی دلچسپی کے مختلف امور پر تفصیلی تبادلہ خیال کیا گیا۔
مصباح کھر نے اس موقع پر چیئرمین سینیٹ سید یوسف رضا گیلانی کی جانب سے نیک تمناؤں کا پیغام پہنچاتے ہوئے پاکستان کے آذربائیجان کے ساتھ تاریخی اور اسٹریٹجک شراکت داری کو مزید مضبوط بنانے کے عزم کا اعادہ کیا۔ انہوں نے علاقائی اور بین الاقوامی امور پر پاکستان کی مستقل حمایت کرنے پر آذربائیجان کا شکریہ ادا کرتے ہوئے کہا کہ دونوں ممالک کے تعلقات باہمی اعتماد، مشترکہ اقدار اور امن و خوشحالی کے مشترکہ وژن پر استوار ہیں۔
آذربائیجان کے سفیر خضر فرہادوف نے دونوں ممالک کے درمیان تعلقات کی مثبت پیش رفت کو سراہتے ہوئے کہا کہ آذربائیجان مختلف شعبوں میں پاکستان کے ساتھ تعاون کو مزید وسعت دینے کا خواہاں ہے۔ انہوں نے کہا کہ دونوں ممالک کی قیادت باہمی روابط کو فروغ دینے اور عوامی سطح پر تعلقات کو مزید مستحکم بنانے کو خصوصی اہمیت دیتی ہے۔
ملاقات کے دوران سفیر کی اہلیہ ترانہ فرہادووا نے پاکستان میں اپنے قیام کے مشاہدات پر مبنی اپنی تصنیف مصباح کھر کو بطور تحفہ پیش کی۔ کتاب میں پاکستان کی ثقافتی وراثت، روایات، عوام کی مہمان نوازی اور معاشرتی اقدار کو محبت بھرے انداز میں اجاگر کیا گیا ہے۔
کتاب وصول کرتے ہوئے مصباح کھر نے اس تحفے کو پاکستانی عوام کے لیے محبت، احترام اور خیرسگالی کی خوبصورت علامت قرار دیا۔ انہوں نے کہا کہ اس نوعیت کی ادبی کاوشیں دونوں ممالک کے درمیان ثقافتی ہم آہنگی، باہمی اعتماد اور عوامی روابط کو فروغ دینے میں اہم کردار ادا کرتی ہیں۔ ان کا کہنا تھا کہ کتاب میں پاکستان کے بارے میں مثبت مشاہدات عالمی برادری کے سامنے ملک کا حقیقی اور روشن تشخص اجاگر کرنے کے ساتھ ساتھ پاکستان اور آذربائیجان کے عوام کے درمیان دوستی کے رشتوں کو مزید مضبوط بنانے میں بھی معاون ثابت ہوں گے۔
ملاقات کے اختتام پر دونوں جانب سے پارلیمانی سفارت کاری، ثقافتی تبادلوں اور عوامی روابط کے ذریعے پاکستان اور آذربائیجان کے دوطرفہ تعلقات کو مزید وسعت دینے اور مختلف شعبوں میں تعاون کو فروغ دینے کے عزم کا اعادہ کیا گیا۔