راولپنڈی(سٹاف رپورٹر)کمشنر راولپنڈی و ڈائریکٹر جنرل راولپنڈی ڈویلپمنٹ اتھارٹی سلمان غنی کے زیر صدارت آر ڈی اے میں اجلاس منعقد ہوا، جس میں مری روڈ اور اس کے اہم چوراہوں پر مجوزہ روڈ مارکنگ اور تزئین و آرائش کے کاموں کے حوالے سے جائزہ لیا گیا۔ اجلاس کے دوران ڈائریکٹر انجینئرنگ آر ڈی اے نے مجوزہ روڈ مارکنگ کے کاموں اور ان پر عملدرآمد کے منصوبے کے حوالے سے تفصیلی بریفنگ دی۔ بریفنگ میں راولپنڈی شہر کی اہم شاہراہوں اور چوراہوں پر زیبرا کراسنگ، لین مارکنگ، کرب اسٹون پینٹنگ اور دیگر متعلقہ کاموں کی تفصیلات پیش کی گئیں۔ بریفنگ کے دوران بتایا گیا کہ مری روڈ کے دونوں اطراف تمام اہم چوراہوں پر زیبرا کراسنگ اور لین مارکنگ کی تجویز دی گئی ہے، جبکہ زیادہ ٹریفک اور پیدل آمدورفت والے مقامات پر خصوصی توجہ دی جائے گی۔ مجوزہ روڈ مارکنگ سے ٹریفک لینز کی واضح نشاندہی، گاڑیوں کی رہنمائی، پیدل افراد کے لیے محفوظ کراسنگ اور اہم چوراہوں پر ٹریفک نظم و ضبط کو بہتر بنانے میں مدد ملے گی۔ اس کے علاوہ منتخب مقامات پر کرب اسٹون پینٹنگ اور دیگر تزئین و آرائش کے اقدامات بھی کیے جائیں گے، جس سے شہر کی اہم شاہراہ کی خوبصورتی میں اضافہ ہوگا۔ اس اقدام کا مقصد ٹریفک مینجمنٹ کو بہتر بنانا، سڑکوں پر محفوظ سفری ماحول کو فروغ دینا، پیدل افراد اور گاڑیوں کے لیے سہولت پیدا کرنا اور راولپنڈی کے مجموعی حسن کو بہتر بنانا ہے۔ کمشنر راولپنڈی سلمان غنی نے مجوزہ کاموں کا تفصیلی جائزہ لیتے ہوئے متعلقہ افسران کو ہدایت کی کہ تمام کام بروقت، معیاری اور مؤثر انداز میں مکمل کیے جائیں۔ انہوں نے کہا کہ تفویض کردہ کاموں کو ترجیحی بنیادوں پر فوری طور پر شروع کیا جائے اور وزیراعلیٰ پنجاب کی ہدایات کے مطابق ان پر عملدرآمد یقینی بنایا جائے۔ انہوں نے مزید ہدایت کی کہ تمام سرگرمیاں مقررہ مدت کے اندر اور منظور شدہ معیار کے مطابق مکمل کی جائیں۔ انہوں نے زور دیا کہ روڈ مارکنگ اور تزئین و آرائش کے کاموں کو مربوط انداز میں انجام دیا جائے تاکہ ٹریفک کی روانی، پیدل افراد کے تحفظ اور راولپنڈی شہر کے مجموعی ظاہری حسن میں نمایاں بہتری نظر آئے۔ انہوں نے متعلقہ افسران کو دورانِ عملدرآمد باہمی رابطہ اور قریبی تعاون برقرار رکھنے اور کاموں کی مؤثر اور مقررہ معیار کے مطابق تکمیل یقینی بنانے کی ہدایت کی۔ اجلاس میں ایڈیشنل ڈی جی آر ڈی اے مسعود احمد بخاری، ڈائریکٹر انجینئرنگ کومل چوہدری، ڈائریکٹر لینڈ غضنفر علی اعوان، ڈپٹی ڈائریکٹر انجینئرنگ جواد ارشد اور دیگر متعلقہ افسران نے شرکت کی۔۔۔۔۔۔