راولپنڈی (نیوز رپورٹر )
​راولپنڈی خیابانِ سرسید سیکٹر ٹو روحانی مرکز خانقاہ حسینیہ شریف مکی مسجد میں جمعہ المبارک کے عظیم الشان اجتماع کا انعقاد ۔ جس میں سجادہ نشین پیر ثناء اللہ حسینی نے ایمان افروز خطاب کیا۔ اس بابرکت اجتماع میں کثیر تعداد میں مقتدیوں، زائرین اور عقیدت مندوں نے شرکت کی۔
​اپنے خصوصی خطاب میں سجادہ نشین پیر ثناء اللہ حسینی نے "حضورِ اکرم صلی اللہ علیہ وآلہ وسلم کی مکہ مکرمہ سے مدینہ منورہ ہجرت” کے عظیم اور تاریخی موضوع پر سیر حاصل گفتگو کرتے ہوئے فرمایا:
​”جب ہجرت کے موقع پر کفارِ مکہ نے معاذ اللہ حضورِ اکرم صلی اللہ علیہ وآلہ وسلم کو قتل کرنے کا ناپاک ارادہ کیا اور آپ صلی اللہ علیہ وآلہ وسلم کے کاشانہِ اقدس کا گھیراؤ کر لیا، تو اس نازک وقت میں اللہ رب العزت نے اپنے حبیب کی غیبی مدد فرمائی۔ نبی کریم صلی اللہ علیہ وآلہ وسلم نے اللہ کے حکم سے زمین سے مٹی اٹھا کر کفار کی طرف پھینکی، جس سے ان تمام ظالموں کی آنکھیں اندھی ہو گئیں اور آپ صلی اللہ علیہ وآلہ وسلم ان کے درمیان سے انتہائی باحفاظت نکل گئے۔”
​پیر ثناء اللہ حسینی نے مزید روشنی ڈالتے ہوئے بتایا:
"یہ وہ تاریخی اور معجزاتی موقع تھا جہاں حق کی فتح اور باطل کی رسوائی ہوئی۔ کفر کے ان تمام ناپاک مکر و فریب اور سازشوں کے جواب میں اللہ پاک کی طرف سے ابولہب اور اس کے انجام کے حوالے سے قرآنی احکامات (تبت یدا ابی لہب) جاری ہوئے اور اسلام کا پرچم ہمیشہ کے لیے بلند ہو گیا۔ یہ واقعہ ہمیں درس دیتا ہے کہ جب اللہ کی نصرت شاملِ حال ہو تو دنیا کی کوئی طاقت حق کی شمع کو بجھا نہیں سکتی۔”
​انہوں نے مزید کہا کہ سفرِ ہجرت ہمیں ہر حال میں صبر، استقامت، اور اللہ کی ذات پر کامل یقین رکھنے کا ابدی درس دیتا ہے۔
​اجتماع کے اختتام پر سجادہ نشین پیر ثناء اللہ حسینی نے ملکِ پاکستان کی سلامتی، امن و امان کی صورتحال کی بہتری، اور امتِ مسلمہ کے اتحاد و یکجہتی کے لیے خصوصی دعا کروائی۔