متاثرہ خاندان کا 15 پر متعدد بار کال کرنے کے باوجود بروقت مدد نہ ملنے کا دعویٰ، وزیراعلیٰ پنجاب، آر پی او، ڈی پی او مظفرگڑھ اور اسسٹنٹ کمشنر علی پور سے شفاف تحقیقات کی اپیل

علی پور (ویب ڈیسک) موضع لنگروا، بستی اسماعیل والی، موضع 4/13 میں ایک غریب خاندان کی مبینہ داد رسی نہ ہونے کا معاملہ سامنے آ گیا۔ متاثرہ شہری اختر حسین نے الزام عائد کیا ہے کہ بعض افراد نے ان کی ملکیتی زمین پر زبردستی قبضہ کرنے کی کوشش کی، انہیں اور ان کے اہل خانہ کو مسلسل ہراساں کیا گیا جبکہ مبینہ طور پر فائرنگ کرکے خوف و ہراس بھی پھیلایا گیا۔
متاثرہ خاندان کے مطابق واقعے کے دوران پولیس ہیلپ لائن 15 پر متعدد مرتبہ رابطہ کیا گیا، تاہم ان کے بقول بروقت اور مؤثر پولیس مدد فراہم نہ کی جا سکی، جس کے باعث خاندان عدم تحفظ کا شکار رہا۔
اختر حسین کا کہنا ہے کہ ان کا خاندان آج بھی انصاف کا منتظر ہے اور انہیں اپنی جان و مال کے تحفظ کے حوالے سے شدید خدشات لاحق ہیں۔ متاثرہ خاندان نے محمد جاوید ولد قلندر حسین پر مذکورہ الزامات عائد کیے ہیں، تاہم ان الزامات کی تصدیق آزاد اور غیر جانبدارانہ تحقیقات کے بعد ہی ممکن ہے۔
متاثرہ خاندان نے وزیراعلیٰ پنجاب مریم نواز شریف، آر پی او ڈیرہ غازی خان، ڈی پی او مظفرگڑھ، اسسٹنٹ کمشنر علی پور اور دیگر متعلقہ حکام سے مطالبہ کیا ہے کہ معاملے کا فوری نوٹس لے کر اعلیٰ سطح کی شفاف تحقیقات کرائی جائیں، اگر کسی بھی فریق کے خلاف الزامات درست ثابت ہوں تو قانون کے مطابق بلاامتیاز کارروائی عمل میں لائی جائے اور متاثرہ خاندان کو جان و مال کا مکمل تحفظ فراہم کیا جائے۔
علاقہ مکینوں نے بھی مطالبہ کیا ہے کہ اراضی کے تنازع کو قانون کے مطابق حل کیا جائے، کسی بااثر فرد کو قانون ہاتھ میں لینے کی اجازت نہ دی جائے اور فائرنگ، دھمکیوں یا قبضے کی کسی بھی کوشش میں ملوث عناصر کے خلاف سخت قانونی کارروائی کی جائے تاکہ عوام کا قانون نافذ کرنے والے اداروں پر اعتماد مزید مضبوط ہو سکے۔